是月也:摄棍被废武功

时间:2020-05-22 作者:

 

是月也:摄棍被废武功

是月也:摄棍被废武功 | 邝公子Hot Gossip

原文刊于 PHOTO MAGAZINE 08-2015 #341

‧ 大家有冇留意,除咗近年好多人玩番菲林之外,亦有好多以前常用嘅拍摄方式和工具,都有兴番嘅趋势。好似近日老编都劲推嘅黑卡,其实都係因为有人玩「摇黑卡」开始兴,好多新手都唔知係乜嚟,亦唔知点用,但《摄影杂誌》就教过大家,开始多人留意番,不过好多人以为求其一张黑色的纸就得,但又唔理有无反光,当然效果唔理想,所以杂誌社就帮读者订製了专用的绒面黑卡,能少3级EV嘅光,先至啱用,唔係画面好易就Fog晒。

‧ 除咗黑卡,亦有人去找寻旧镜,然后改装,为咗嘅係现今镜头没有嘅「散景」,即係焦点后面嘅模糊效果,有啲係呈特别嘅圆形,有啲甚至有旋转嘅效果,其实咪就即係以前镜头嘅光学技术未够班出现嘅像差啰,以往嘅缺点,变成咗今日大家嘅创意啦。由于呢啲效果要用PS后製执出嚟会较麻烦,暂时亦未有相机内置电子Filter做到(相信要做都唔係话唔得),所以想玩嘅人索性去搵支实体镜,但呢啲镜可遇不可求,亦唔会新净,难怪有生产商睇中呢个门路,好似Lomo都复刻支俄镜Petzval 58,而Lensbaby就出支Velvet 56,满足大家想玩旋转Bokeh嘅愿望。

‧ 除咗古老当时兴外,其实数码相机也带来了好多摄影嘅新玩法,数码因为感光强,要做长时间曝光较困难,以往做法係加块劲减光嘅ND滤镜,有时用ND400X,甚至ND1000X,为嘅係可以让曝光时间更长,用于拍摄流水、海浪、行云,以至车轨、光轨便能更靓。不过最近好多用家发觉相机嘅内置多重曝光功能,可以自动叠到相近嘅效果,所以连ND滤镜都悭番,好处除咗係悭到钱之外,亦可以唔使加滤镜,减少画质打折扣嘅机会。

‧ 其实,呢啲五花八门嘅玩法,其实都係因为有咗数码相机先至会咁多人玩,好似红外线摄影咁,以前边有咁容易,依家随便一部手机都玩到啦,反而相机靓咗,要改机才可以影到啦。所以话,数码年代真係各施各法,好多新嘢玩,玩极都唔厌。

太多机款唔识拣?

‧ 眨下眼今年已经过咗半年,有消息话下半年还会有多部猛机推出,不过上半年出嘅新机,公子个老友就话唔啱自己咁话,佢话太Pro自己又唔需要,太入门自己又唔想要,中间一啲嘅唔係嫌唔够新,就嫌唔高唔低,话依家相机好难拣喎。

‧ 呢啲咪就係中间路线,庸人自扰啰,老实讲,都係睇Budget啫,其实重边有人会同自己定级数,话自己係新手个心又唔舒服,话自己係高手又惊唔到班,查实中级机先係最多人拣呀!

‧ 除咗价钱和级数之外,其实摄影人拣相机还要睇究竟想用嚟影乜,单反有单反嘅影法,无反有无反嘅方便,DC则有利于Snapshot等,所以仍然唔知拣乜,不妨去上下摄影课,又或者参考下摄影书。

 

围观: 491次 | 责任编辑:

延伸阅读